مواويل

 

 مواويل
 

أوفْ وْعَتابا وْليلْ ... آهْ وْميجَنا 
مَوّالْ جُرْحي صارْ نَغْماتْ الغُنا 
قَالْ لي الوَرَقْ لَمّا جَرَحْتُه بِالكَلامْ 
ماغيرْ قَلْبَكْ عَ جِراحَكْ ما حَنا 

 

عَجَبي! 
 

 

عَصفورْ صَارلو عُمُرْ عايِشْ عَ شبّاكي 
وْعُمْره ما غرّد يوم لَو شافْني باكي 
سَمّيتُه طيرِ الوَفا مِنْ حَسْرِتي وَاللهْ 
أنا اللّي طَعَنّي البَشَرْ لَمّا جيتْهُم شاكي 

 

عَجَبي! 
 

 

يا طولْ هَمّي وِالوَجَعْ جَبّارْ 
ضَيَّعْتْ خِلّي وِالأَهِلْ والدّارْ 
قَال لي زَماني وْكُنْتْ مِفْتِكْرو عَدُوْ 
عَ غيرْ أَهْلْ الجَهِلْ عُمْرِ الدَّهِرْ ما جارْ 

 

عَجَبي! 

 

آهينْ عَ الدُّنْيا اللّي باعَتْني رْخيصْ 
رَماني زَماني وْكُنْتْ فاكِرْني حَريصْ 
قالْ الشَّرَفْ ما عادْ في النّاسْ انْذَكَرْ 
لمَا الكَرامِةْ صارَتْ بْسِعْرْ القَميصْ 

 

عَجَبي! 
 

 

طَوِّلْ يا ليلْ وْما تْرَوِّحْ يا قَمَرْ 
كيفْ العَمَلْ جِفْني تْعَوَّدْ عَ السَّهَرْ 
نَيزَكْ غَضَبْ شُفْتُهْ عَتِمْ دَهْري غَزا 
قَالْ لي أَسيرْ الحِلِمْ عُمْرُهْ ما انْتَصَرْ 

 

عَجَبي! 
 

 

حِلْوِةْ الحَياةْ... وْمِثِلْها حِلْوْ الأمَلْ 
والحُبّْ أصْلو يا ناسْ إيمانْ وْعَمَلْ 
يا تايْهينْ بْهَالزَّمَنْ هذا الطّريقْ 
بَرْ الأمانْ حْبالْ مِنْ وِدْ وْوَصِلْ 

 

عَجَبي! 
 

 

تِحْتارْ ليشْ يا ابِنْ آدَمْ... يا إِنسانْ 
هذا الطَّريقْ ... وأنتِ لَكْ عَقْلْ وْلِسانْ
يا اللّي رَماكْ الطَّمَعْ في حيرِةْ وْأَلَمْ 
جَرِّبْ تْعيشْ بْحُبْ وِبْحُضْنْ الإيمانْ 

 

عجَبي!

 

 

آمال ابو فارس المربية الاديبة والشاعرة, المسؤولة عن زاوية المنتدى الثقافي. يمكنكم الاتصال بها  Amlabo@walla.com او على هاتف 0549026108